Norski tréskurðarmeistarinn Bjarte Aarseth dvaldi hér í byrjun júlí við útskurð á vígásum nýrrar sýningar um Snorra, sem nú er í burðarliðnum. Hann kemur aftur þann 25. ágúst n.k. til að ljúka verki sínu við vígásana. Hann mun eins og í fyrri heimsókn sinni vinna í sýningarrýminu og bjóða fólki að fylgjast með vinnunni. Bjarte vakti mikla athygli sýningargesta, sem nutu þess að fylgjast með meistara í útskurði.

Bjarte er aðal tréskurðarmeistari norska þjóðminjasafnsins og fínvinnur viðinn,sem búið er að skera út með nýjustu tækni í vél. Sigríður Kristinsdóttir hannaði grunnmyndina, sem líkist inngangi stafkirkna á dögum Snorra og kallast vígásar.

Við anddyri kirkna og bæjarhúsa á miðöldum var iðulega útskurður, og mikilúðug aðkoma. Dýrlingar og englar, dýr og vættir til verndar, en vígásar voru gerðir úr tré og ætlaðir til þess að varna ófriðarmönnum inngöngu í hús.