Snorrastofa bauð yngstu nemendum á Kleppjárnsreykjum að koma í sögustund í bókhlöðunni mánudagsmorguninn 12. nóvember s.l., en það markaði upphaf Norrænu bókmenntavikunnar, sem við höldum í heiðri ásamt Degi íslenskrar tungu, sem passar ljómandi að viðburðum vikunnar.

Börnin hlustuðu af athygli á söguna, Handbók fyrir ofurhetjur eftir Elias og Agnes Våhlund, sem Ingibjörg Kristleifsdóttir las. Hægt var að sýna bókina á tjaldi um leið og hún var lesin og það jók á upplifun barnanna. Þegar lestrinum lauk, voru allir mjög spenntir fyrir að fá að heyra framhaldið, sem bíður í næstu bók. Lesturinn hafði tilætluð áhrif, vakti áhuga á efninu og hvatti til áframhaldandi eigin lesturs.

Eftir sögustundina veitti Hönnubúð gestunum svaladrykk og börnin vildu gjarnan festa eitthvað af sögustundinni á sitt eigið blað. Bókhlaðan geymir verk barnanna frá hverju ári og á orðið dágott safn af teikningum gesta í sögustundum af þessu tagi.

Börnin gæddu húsið skemmtilegu lífi með nærveru sinni og starfsfólk Snorrastofu ásamt sögumanninum kvöddu þau og kennara þeirra með þakklæti.

Myndir (J.E.)

Myndasafn