Fyrirlestrar í héraði á Reykholtshátíð:   Lífríki spora. Um fótfestu í ljóðum Þorsteins frá Hamri
23. júlí 2021

Fyrirlestrar í héraði á Reykholtshátíð: Lífríki spora. Um fótfestu í ljóðum Þorsteins frá Hamri

Bókhlaða Snorrastofu

Þorsteinn frá Hamri

Laugardaginn 24. júlí kl. 13 flytur Ástráður Eysteinsson, prófessor í bókmenntafræði við Háskóla Íslands, fyrirlestur í Bókhlöðu Snorrastofu um ljóðskáldið Þorstein frá Hamri. Ljóð hans, Draumljóð, verður einnig viðfangsefni tónskáldins Ingibjargar Ýrar Skarphéðinsdóttur á sjálfri tónlistarhátínni í Reykholtskirkju sunnudaginn 25. júlí. Fyrirlesturinn er öllum opinn og er aðgangur ókeypis.

Þorsteinn frá Hamri er meðal fremstu nútímaskálda íslenskrar tungu. Þegar hann steig fram á bókmenntasviðið fyrir ríflega sex áratugum, þótti sumum ungskáldið úr uppsveitum Borgarfjarðar að vísu nokkuð fornt í lund, komið til borgarinnar með sjónarsvið og orðlistararf fyrri alda. Svar Þorsteins birtist í heiti annarrar ljóðabókar hans: Tannfé handa nýjum heimi (1960), en það má teljast vísun til bernskubrölts nútímans, sem skáldið á brýnt erindi við. Hann undirstrikaði það með heiti síðustu bókarinnar sem hann gekk frá. Hún heitir Núna (2016).

Þorsteinn frá Hamri sækir umboð sitt og viðfangsefni í senn til sögunnar og samtímans. Æviskeið skáldsins er samofið hvoru tveggja á hugkvæman og djarfan hátt í ljóðum þar sem mælandi finnur sér stað er lesanda býðst að deila með honum.

Ástráður Eysteinsson er uppvaxinn í Borgarnesi, lauk stúdentsprófi frá Menntaskólanum við Hamrahlíð (1976) og BA-prófi í þýsku og ensku við Háskóla Íslands (1979). Hann stundaði síðan framhaldsnám í bókmenntafræði og þýðingafræði við háskóla í Englandi, Þýskalandi og Bandaríkjunum, þar sem hann lauk doktorsprófi við University of Iowa 1987. Kennsluferill hans hófst í Breiðholtsskóla 1977 og meðfram háskólanámi kenndi hann við grunnskóla, menntaskóla og háskóla. Hann hóf að kenna við Háskóla Íslands 1987 og hefur verið þar prófessor í almennri bókmenntafræði frá 1994. Ástráður hefur sinnt fræðaverkum sínum – fræðilegri ritstjórn, samningu nokkurra bóka og fjölda greina – jöfnum höndum á íslensku og ensku. Hann hefur fengist við stefnur og strauma í nútímabókmenntum Vesturlanda, með áherslu á bókmenntir innan málsvæða ensku, þýsku og íslensku. Rannsóknir Ástráðs hafa einnig beinst að þýðingum og hann var brautryðjandi í þýðingafræði í íslensku samhengi, auk þess sem hann hefur verið virkur bókmenntaþýðandi. Hann hefur einnig sinnt margskonar stjórnunarstörfum við Háskóla Íslands og var m.a. forseti Hugvísindasviðs skólans frá 2008 til 2015.

Myndasafn

Opnunartímar skrifstofu Snorrastofu og Bókhlöðu

Virka daga 10:00–17:00
Prjóna-bóka-kaffi

Opnunartímar Gestastofu

1.maí - 31.ágúst:
Alla daga 10:00 - 17:00

1.sept - 30.apríl:
Virka daga 10:00 - 17:00
Á öðrum tímum eftir samkomulagi.